وحشنا اوى الشعار دة من يوم ما غيروة وبقى الشعب والشرطة فى خدمة الوطن وحصل بلاوى ضرب فى القسم دة واغتصاب فى النقطة دى وتعزيب اشكال والوان وكانهم عملو الشعار دة علشان محدش يطلب حماية الشرطة على اساس انها فى الشعار القديم كان المفروض انها بتخدمة دلوقتى طبعا هما الاتنين الشعب والشرطة راس براس الاتنين بيخدمو الوطن اللى هو اية بقة ايوة اسم النبى حارسك وصاينك اللى هو مصر بس تقريبا الموضوع دة اتحول وبقيت مصر هيا الحكومة والسلطة يعنى احنا دلوقتى بمقتضى الشعار الجميل دة خدام السلطة وبدال احنا خدم يبقى عادى بقة ماكتير سمعنا عن خدامات بينضربو هنا وهنا عادى جات علينا احنا الشعب وبعدين فيها اية لما مخبر ولا ظابط يعذبك ولا يهينك ولا ؟؟ عادى يا اخى احنا فى بلد ديمقراطى روح اشتكى هتشتكى فين دة كلام برضو تشتكى فى نفس النقطة او القسم ويا سلام لو نفس الظابط تبقى كانك با الظبط بتشتكى لروحك وتفتكر سا عتها اغنية كاظم الساهر اشكيك لمين وساعتها بس هتحس ان الظابط او المخبر دة حبيبك وبيعمل كدة علشان مصلحت البلد اللى هيا مصر يعنى انت وانا وكل اللى انضربو واتعذبو وهيتعذبو فى اقسام الشرطة بيحصل فينا كدة علشان خاطر مصر ياة دة حتى فى المثل بيقولو ضرب الحبيب زى اكل الزبيب شوف حتى الناس القديمة اللى قالت المثل كانت عارفة ان الوزير بتاع الداخلية عندنا هيبقى اسمة حبيب العادلى علشان كدة قالو ضرب الحبيب تعرف لو قالو ضرب ابوك او امك كنت هقوللك لا مش من حقهم يضربونا بس شوفت بقة دة زمن الفن الجميل هو اللى قال وبعدين يعنى افرض اخوك الظابط دة ما عرفش يضربك ولا يعذبك ولا يطلع كل مشاكلة وعقدة دى فيك يطلعها فين يعنى فى البيت مش حلو برضو عيب حتى يبقى فى شعب جميل زى شعبنا واى ظابط يطلع همة فى البيت دى مش اخلاق ولا هيا دى الاخوة ولا هو دة معنى الشعب والشرطة فى خدمة الوطن مش كدة ولا اية
كتبها ali aliwa في 08:30 مساءً ::
11 تعليق
في19,آب,2007 - 10:23 صباحاً, مسلمه كتبها ...
شر البلية مايضحك ..
أسأل الله أن يهدي لأمتنا أولياء أمورهم
ولعل الله يحدث بعد ذلك أمراً
بحفظ الله ورعايته
في19,آب,2007 - 02:08 مساءً, ali aliwa كتبها ...
ربنا يسمع منك ويهد ى الامة لما فية الخير وفعلا شر البلية ما يضحك
في20,آب,2007 - 05:29 مساءً, ashraf abdelaleem كتبها ...
مفيش عندي غير اني اقول انها تحويله ذي لو تفتكر فبلم التحويله اصبحنا بنخاف من الشرطه ربنا يهديهم
في20,آب,2007 - 05:30 مساءً, ashraf abdelaleem كتبها ...
نسيت ان اشكرك على مرورك الكريم لمدونتي
في22,آب,2007 - 07:17 صباحاً, مجهول كتبها ...
شوف يا اخ عليوه اولا الف مبروك على مدونتك الجديده وثانيا احب اشكرك على الكلام الجميل ده وثالثا انا احب اقوللك ان الشعار ده موحشكش لوحدك ده وحشنا كلنا والله وانا اولهم وبالسبه لحكايه التعذيب دى حاجه مش جديده عليهم وربنا يسمع منك خلى بالك يا اخ عليوه احنا كمان علينا واجبات وخلى بالك كمان احنا لو معملناش الغلط مش هيبقى ضرب ولا اهانه اوك يا اخ سلامممممم....؟؟؟؟؟؟؟؟؟؟
في22,آب,2007 - 12:12 مساءً, ali aliwa كتبها ...
شكرا يا اشرف على تشريفك مدونتى وفيلم التحويلة فيلم جميل واحنا بقينا نخاف من الشرطة لانهم ما بقوش بيخافوا علينا بقيت شغلتهم انهم يخوفونا وربنا يهدى
في22,آب,2007 - 12:14 مساءً, ali aliwa كتبها ...
طيب يا راجل كنت سيب اى استدلال عليك علشان اعرف اكلمك با اسمك على العموم شكرا لمرورك على مدونتى وبا النسبة لموضوع اانا احنا بنعمل الغلط علشان كدة بيحصل ضرب ما شى يا سيدى على الاقل يبقى الضرب على قد الغلط مش يشتبهو ا فى طفل عندة 12 سنة انة سرق باكو شاى يقومو يقتلوة مش كدة ولا اية
في01,أيلول,2007 - 09:31 مساءً, لـيـالــي .. كتبها ...
كم الاهانات والتعذيب الغير ادمي بيدل على شئ واحد
هو اقتراب انقراض ما يسمى النخوه والرجوله
لو الناس تعرف ربنا بجد مكنش شئ من دا حصل
مش بس الشعار اللي افتقدناه
اللي مفتقدينه حاجه كبيره صعب ترجع تاني
امتى الهدايه للجميع وربنا يرحمنا جميعا دنيا واخره
لك وافر احترامي
في02,أيلول,2007 - 07:19 مساءً, ali aliwa كتبها ...
عندك حق يا ليالى احنا افتقدنا اشياء كتير غير الشعار حتى احترامنا للانسانية وربنا يهدى الناس للافضل ولكى وافر تقديرى
في03,أيلول,2007 - 08:38 صباحاً, سما كتبها ...
لاحول ولا قوة إلا بالله ..
كلمات في الصميم وموجعة مرة أخرى ياعلي ..
الله ينتقم من كل ظالم .
شكرا لك
في03,أيلول,2007 - 02:06 مساءً, ali aliwa كتبها ...
فعلا ربنا ينتقم من كل ظالم واحلى كلمة سمعتها يوم عن التعذيب كانت من الراحل الجميل صلاح جاهين بيقول فيها انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!! شكرا يا سما على تشرفك مدونتى