جايللك يا ابو صلاح

على رايح فين يا ابو صلاح يا صلح استنى بس هكمللك ده احنا كمان اديناهم بترول وقولنالهم معلومات عن اخوانا با العراق استنى بس يا صلح هتعمل ايه استنى ما ترميش نفسك صلاح يا ايوبى رايح فين انت زعلت من ايه بس استنى انا مش بعرف اعوم وهكذا وبعد كل ما سمعه عن احوالنا وعرف انه مفيش فايده رمى نفسه فى بحيره طبريه وانا لله وانا اليه راجعون انا رايح اشوى السمك بقه سلام ويدوب بلف وسمعت صوت

 استنى رايح فين هو دخول الحمام زى خروجه

على حضرتك مين وعاوز ايه

؟؟؟؟؟؟؟؟ هتعرف كمان شويه هاتوه

وفجاءه يهجم عليا اتنين طول بعرض با ارتفاع ويرمونى فى بوكس

على فى ايه انا عملت ايه واخدينى على فين

؟؟؟؟ انت فاكر ان البلد ما فيهاش حكومة شايفه وعارفه كل حاجة قتلت الراجل ليه

على راجل مين يا باشا ده كله كلام فى كلام خيال يعنى

؟؟؟؟؟؟ وكمان بتستهبل هتعمل مجنون هنشوف لما نوصل هتفضل مجنون لحد امتى يا عليوه

على طيب احنا رايحين على فين

؟؟؟؟؟ هتعرف لما نوصل

بعد شويه ولما وصلنا عرفت انى فى قسم شرطه بس شرطة ايه مش عارف

الباشا ها هتقول قتلته ليه ولا هتتعبنا معاك

على ياباشا ده كله خيال كلام وبس

الباشا يشاور لاتنين مخبرين رجعوله عقله شكله هيتعبنا

ومع اول قلم ومن اول ركله رجل ومن اول شلوت وقبل ما توصلنى خطافيه من المخبر الشديد اللى فيهم

على خلاص يا باشا هعترف انا اللى قتلت صلاح الدين الايوبى ولو عاوزنى اعترف انى انا اللى غرقت العباره وانى انا اللى حرقت القطر وسرطنت المبيدات وبا النسبة لثوره 19 انا اللى قتلت ال19 دول اعترف باى حاجه

الباشا ايوه كدة ما كان من الاول لازم يعنى تخلينا نتعب ايدينا ورجلينا معاك

على معلش يا باشا قله عقل ربنا يزود النجوم فوق الظبلايط على كتافك وتاخد سيفين يقطعوك قصدى سيفين ونسر وتبقى لواء قد الدنيا

الباشا خلاص يا روح امك انت هتصاحبنى ها بقى بهدوء كدة ومن غير كلام كتير قولى على اعضاء التنظيم اللى انت واحد منه

على تنظيم ايه يا باشا مكانش فى حد فى الخيال معايا غير صلاح الدين ومات الله يخرب بيت البانجو وسنينه

الباشا ولا ها اخليهم يفكروك شكللك بتستهبل طرخخخخخخخخخخ

قلم ظباطى ما لهوش اخ خلانى فى ال\باى باى

على خلاص يا باشا هعترف الله يخربت جريدة الدستور واللى عملتة فيا

الباشا بتبرطم بتقول اية يا روح اهللك

على ولاحاجه يا باشا ولا حاجه

الباشا ها مين بقه الرئيس

على الرئيس هو فى حد ما يعرفش الريس ده حتى دايما فى بالنا وفى خيالنا ده انا حتى انا كان نفسى احلم بية زى ما حصل فى صلاح الدين فى اخر الحلم

الباشا مش الريس ده يا عم الخيال انا بسال عن رئيس التنظيم بتاعك ها اخليهم يفكروك

على لا يا باشا خلاص فهمتك سامحنى يا رب رئيس التنظيم يا باشا هو ابراهيم عيسى وده بقه بيقول كلام عن الريس والحكومه انتوا سايبينه ليه يا باشا ده مبهدلكم وبا النسبة لامير الجماعة علشان ما تتعبش نفسك وتسال هو بلال فضل ده مصيبه يفضل يسخر منكم وسخريتة لذيذه وكلامه جميل بس انا مش معاه فى كلامه انا بقراه وبحسه وافهمه بس سا محنى يا هيما انت وبلبل

الباشا حلو اوى كدة كمل يا روح اللى جابتك احكى عن باقى التنظيم اشجينى سمعنى سمعت الرعد

على بصوت واطى رعد يبوظ ودانك وبرق ياخد اجللك

الباشا سمعنى يا ابن ؟؟؟؟؟؟ بتقول ايه

على ولا حاجة يا باشا بدعيللك ربنا يعلى مراتبك الفين مرتبه وتبقى انت تحت منهم هقوللك يا باشا احنا وصلنا لحد امير التنظيم با النسبه بقه يا باشا قائد الجناح العسكرى فده اسمه خالد كساب ومعاه ناس فى الجناح ومسمين نفسهم ضربة شمس ودول بقه اللى بيسخنوا الناس يا باشا على الناس المحترمه اللى زى حالاتك وخالد ده يا باشا عامل نفسه ريس والكل بيقوله يا ريس ومعاه بقه حنان الجوهرى ومحمد الدسوقى ومى سمير واميرة حسن وهشام هلال وشادى زلط ودعاء عادل وفى حته لبنانى كمان تنظيم دولى وفى بقه دراع خالد اليمين اخوه وليد كساب اكمللك يا باشا ده فى ناس بتبعتلهم وما تقولش لخالد غير يا ريس منهم هيما كول وبانجو اسمه لوحدة قضيه

الباشا لا مش مهم هنجيبهم كلهم على مهلنا كمل كمل عاملين بلد جوه البلد فاكرينها بتاعتكوا لا دى بتاعتنا احنا اللى بتعب ونسهر علشانكوا ولا انت عندك راى تانى

على هو فى راى بعد رايك ده انت بتقول ضرر يا باشا ربنا ما يحرمك ويطعمك وبصوت واطى واشوفك كدة مولع فى نار جهنم اكمللك يا باشا با النسبة للاعضاء الجدد فدول يا سيدى مسؤول عنهم هشام عبيه هو المسؤول عن انتشار التنظيم وفيهم اعضاء كتير دايما بشوفهم هناك منهم على سبيل المثال مش الحصر مروه جمعه وصالح سعيدوعمرو عبداللة عبد الرحمن ود اسماء عبد العاطى وهبة سعيد ومحمد فوزى ورحاب صالحهدى عبد القادر وغيرهم كتير

الباشا حلو اوى كمل ده انتوا هتشوفوا ايام سوده انت شيوعى يا ض

على لا يا باشا استغفر اللة شعوعى ايه انا مسلم ولا بلاش مسلم احسن تقولى انى اخوان وانتو بتكرهوا الكلمة دى انا مواطن مصرى يا باشا

الباشا يعنى ايه مواطن مصرى يا خويا خدت اذن من مين علشان تبقى مواطن وكمان مصرى كمل يا ابن؟؟؟؟؟ بقيت التنظيم كمل احسن هقوم افرمك

على لا يا باشا ودى تيجى اهو يا باشا ولا تتعب نفسك انا هضرب نفسى طرخ طرخ حلو كده يا باشا اكمللك بقه فى خلية يا باشا فى التنظيم اسمها لا فى ايدى سيف ولا تحت منى فرس بيقولوا كلام وحش فى حقكم وبيسخنوا الشعب عليكم وفى امير فى التنظيم اسمه ابراهيم منصور بيقول كلام عنكم وبيتكلم عن مصر بقه واللى بتعملوه فيها وعن الوزراء والحكومه ربنا يهدى يا باشا وفى خليه عن التعليم وخليه عن الفن والفنانين وفى خليه عن الدين اميرها ممدوح الشيخ وفى خليه عن الحاجات المرعبه اللى فى الدنيا بس مش بيجيبوا سيرة الداخليه يا باشا

الباشا يجيبوا سيرتنا ليه يا خويا شايفنا بنعض ولا بنضرب ولا بنموت ولا بنعذب

على لا يا باشا لا سمح اللة شايف حاسس يا باشا وبعدين ده ايد سعادتك احن من ايد اقل مخبر فى الداخليه اكمللك يا باشا بقيت التنظيم فى خلية كمان يا باشا خاصه بتسليه الاعضاء بيجيبوا فيها العاب اجنبيه وزى ما تكون خلاص الالعاب بتاعتنا خلصت ومنها الحجله والكوره الشراب واحلى لعبه بقه عريس وعروسه عمرك ما لعبتها دى يا باشا مع ابن الجيران

الباشا لعبتها كتير وشكلى هلعبها معاك ولا ايه

على لا يا باشا وعلى ايه دى حتى لعبه بايخه فى بقه خليه اسمها لولا اختلاف الراى بقه فيها ناس جامده د يحيى الرخاوى ابراهيم داوود بثينه كامل د احمد يونس محمد القدوسى ومحمد احسان عبد القدوس دة بقه عاملى فيها صاحب قهوه ومعلم يعنى وحلمى النمنم واكرم السعدنى وغيرهم يا باشا وخليه رياضيه علشان العقل السليم فى الجسم السليم بصوت واطى ربنا يهرى بدنك يا بعيد وغيرهم وغيرهم

الباشا وبا النسبة للمنشورات بقه بتعملوها ازاى

على شوف يا باشا فى منشورات يوميه ودى بتتوزع كل يوم وفى منشور اسبوعى وده كل يوم اربع وبيفضل لحد يوم الحد وبعد كدة بيتلم

الباشا مش عارف اقوللك اية يا روح امك بس انت عملت احلى واجب معايا ولازم اردللك الواجب با احسن منه عارف بحيره طبريه

على اه يا باشا ودى تتنسى اللى انا قتلت فيها صلاح الدين الايوبى ورميته فيها وسرقت السمك كمان بس ما لحقتش اكلة فى ناس انا عارفهم بصولى فيه

الباشا انا يا علوه الواجب بتاعى اخليك تحصل صلاح الدين ايه رايك تحصله ولا تقعد معانا هنا يومين تلاته والمخبرين هنا بتاعتنا بتحب لعبه عريس وعروسه جدا تحب تفضل معانا

على لا يا باشا ربنا ما يحرمنى من عطفك طبرية حلوه واحنا حتى فى صيف

جايللك يا ابو صلاح التدوينه دى اهداء منى الى جريدة الدستور اللى انا سيحتلهم مع الظابط الجريده اللى يا رب تعيش لحد ميت مليون عدد يا رب